प्रतिनिधिसभा निर्वाचन नजिकिँदै जाँदा आज (मंगलबार) राति १२ बजेदेखि मौन अवधि सुरु भएको छ। आगामी फागुन २१ गते हुने मतदानलाई लक्षित गर्दै निर्वाचन आयोग ले मतदान हुनुभन्दा ४८ घण्टा अघिदेखि निर्वाचन प्रक्रिया सम्पन्न नभएसम्म ‘स्थिर समय’ लागू गरेको हो।
मौन अवधि प्रारम्भ भएसँगै अब कुनै पनि राजनीतिक दल, उम्मेदवार वा तिनका प्रतिनिधिले मतदातासँग प्रत्यक्ष वा अप्रत्यक्ष रूपमा मत माग्न पाउने छैनन्। चुनावी सभा, जुलुस, घरदैलो कार्यक्रम मात्र होइन, सामाजिक सञ्जालमार्फत गरिने डिजिटल प्रचारप्रसारसमेत पूर्ण रूपमा निषेध गरिएको छ।
निर्वाचन आचारसंहिता अनुसार मतदान केन्द्रको ३ सय मिटर वरिपरि राखिएका दल वा उम्मेदवारका ब्यानर, झण्डा र पोस्टरहरू अनिवार्य रूपमा हटाउनुपर्ने कानुनी व्यवस्था छ। शान्त, निष्पक्ष र मर्यादित वातावरणमा मतदान सम्पन्न गराउने उद्देश्यले यो प्रावधान लागू गरिएको आयोगले जनाएको छ।
आयोगका अनुसार मौन अवधिमा मतदातालाई आर्थिक प्रलोभन वा अन्य कुनै माध्यमबाट प्रभावित पार्ने गतिविधि हुनसक्ने जोखिमलाई ध्यानमा राख्दै अनुगमनलाई कडाइ गरिएको छ। २४ सै घण्टा आचारसंहिता उल्लंघनको सूक्ष्म निगरानी भइरहेको आयोगले स्पष्ट पारेको छ।
यस अवधिमा कुनै पनि प्रकारका छलफल, अन्तर्क्रिया, सभा-सम्मेलन वा गोष्ठी नगर्न तथा आचारसंहिताको पूर्ण पालना गर्न आयोगले सबै सरोकारवालालाई सचेत गराएको छ।
फागुन २१ गते बिहान ७ बजेदेखि सुरु हुने मतदानका लागि आवश्यक प्राविधिक तथा सुरक्षा तयारी पूरा भइसकेको आयोगले जानकारी दिएको छ।
Advertisement
