ललितपुर – नेशनल चेष्ट सेन्टर ले ललितपुर महानगरपालिका–१३, मानभवनमा स्वासप्रश्वास (छाती) सम्बन्धी रोगका बिरामीलाई लक्षित गर्दै विशेषज्ञ सेवा सुरु गरेको छ। नेपालमै पहिलो पटक स्वासप्रश्वास रोगमा केन्द्रित भएर बहुआयामिक सेवा प्रदान गर्ने उद्देश्यसहित स्थापना गरिएको उक्त सेन्टर शनिबार औपचारिक रूपमा सञ्चालनमा आएको हो।
सेन्टरको उद्घाटन ललितपुर महानगरपालिका–१३ का वडाध्यक्ष गणेश केसीले गर्नुभयो। उद्घाटन समारोहमा उहाँले आफ्नै वडामा विशिष्टीकृत चेष्ट क्लिनिक सञ्चालनमा आएकोमा खुसी व्यक्त गर्दै गुणस्तरीय स्वास्थ्य सेवा प्रदान गर्न सफल होस् भन्ने शुभकामना व्यक्त गर्नुभयो। आवश्यक सहकार्यका लागि वडा कार्यालय सधैं तयार रहने उहाँले बताउनुभयो।
सेन्टरले विशेषज्ञ चिकित्सकमार्फत सिओपीडी, दम, क्षयरोग, एलर्जी तथा अन्य दीर्घकालीन फोक्सो रोगको परीक्षण र उपचार सेवा प्रदान गर्ने जनाएको छ। यहाँ फोक्सोको कार्यक्षमता परीक्षण (Pulmonary Function Test), डिजिटल एक्स–रे, एलर्जी तथा दम परीक्षण, कोभिड–१९ पछिको फोक्सो परीक्षण क्लिनिक, धूम्रपान त्याग परामर्श, अत्याधुनिक प्रयोगशाला सेवा तथा आफ्नै फार्मेसी सुविधा उपलब्ध गराइएको छ। एकै स्थानबाट एकीकृत सेवा प्रदान गरिने भएकाले बिरामीलाई सहज हुने सेन्टरको दाबी छ।
विश्व स्वास्थ्य संगठन (WHO) का अनुसार विश्वभर हरेक वर्ष करोडौँ मानिस स्वासप्रश्वास रोगबाट प्रभावित हुने गरेका छन्। नेपालमा पनि करिब १०–१२ प्रतिशत वयस्क जनसंख्यामा कुनै न कुनै प्रकारको दीर्घकालीन स्वासप्रश्वास समस्या रहेको विभिन्न अध्ययनले देखाएका छन्। बढ्दो वायु प्रदूषण, धूम्रपान, जैविक इन्धनको प्रयोग तथा कोभिड–१९ पछिको असरका कारण समस्या झन् बढ्दो क्रममा रहेको चिकित्सकहरू बताउँछन्।
वरिष्ठ छातीरोग विशेषज्ञ डा. राजु पंगेनीका अनुसार नेपालजस्तो विकासोन्मुख मुलुकमा स्वासप्रश्वास सम्बन्धी रोगबाट हुने मृत्युदर अझै उच्च रहेकाले विशेषीकृत र गुणस्तरीय उपचार सेवा आवश्यक छ।
सेन्टरले उपचारसँगै स्वासप्रश्वास रोगको रोकथाम, जनचेतना अभिवृद्धि तथा नियमित परीक्षणको प्रवर्द्धनमा समेत जोड दिने जनाएको छ। काठमाडौं उपत्यकासहित देशभरका बिरामीलाई सेवा दिने लक्ष्यका साथ सञ्चालनमा आएको सेन्टरले सहुलियत दरमा विशेषज्ञ सेवा उपलब्ध गराउने प्रतिबद्धता जनाएको छ।
