काठमाडौँ– नेपाली काँग्रेस रौतहटका पूर्वसांसद मोहम्मद अफताब आलमको निधन भएको छ। उनको पचारका क्रममा गएराति २:५८ बजे काठमाडौँ मेडिकल कलेजमा मृत्यु भएको जिल्ला प्रहरी परिसर काठमाडौँका प्रवक्ता एसपी पवनकुमार भट्टराईले जानकारी दिए।
मुटु सम्बन्धी समस्या भएपछि केही समयअघि उनलाई भेन्टिलेटरमा राखेर उपचार भइरहेको थियो। शव अन्तिम संस्कारका लागि रौतहटको राजपुरतर्फ लगिएको सुरक्षा स्रोतले जनाएको छ।
गत जेठमा नक्खु कारागारबाट रिहा भएका आलमलाई त्यसपछि ब्रेन स्ट्रोक भएपछि माइतीघरस्थित अन्नपूर्ण न्यूरो अस्पतालमा भर्ना गरी उपचार गरिएको थियो।
२०६४ सालको संविधानसभा निर्वाचनतर्फको तयारीका क्रममा बम विस्फोटमा घाइते भएका व्यक्तिलाई इट्टाभट्टामा जिउँदै जलाएको आरोपमा आलमविरुद्ध मुद्दा चलेको थियो। जिल्ला अदालत रौतहटले उनलाई दोषी ठहर गर्दै जन्मकैदको सजाय सुनाएको थियो। तर उच्च अदालतले प्रमाण अभाव देखाउँदै आलमसहित सबै प्रतिवादीलाई सफाइ दिएको थियो।
उक्त मुद्दा सर्वोच्च अदालतमा पुनरावलोकनका लागि पुगेको छ र अन्तिम फैसला आउन बाँकी छ।
