काठमाण्डौ- देशभर आजदेखि मौसममा थप सुधार हुने भएको छ । जल तथा मौसम पूर्वानुमान महाशाखाका अनुसार हिजोदेखि नै मौसम क्रमिक रूपमा सुधार हुँदै आएकोमा आज अझ सुधार हुने अनुमान गरिएको हो ।
मौसमविद् सञ्जीव अधिकारीका अनुसार बङ्गालको खाडीबाट विकसित मोन्था चक्रवातको प्रभाव हटिसकेको छ । यद्यपि, अहिले पनि पश्चिमी वायु र अरब सागरमा बनेको न्यून चापीय प्रणालीको आंशिक प्रभाव नेपालमा रहेको छ, जसका कारण केही ठाउँमा पानी पर्ने सम्भावना छ ।
उनका अनुसार कोशी, बागमती र गण्डकी प्रदेशका पहाडी भागका थोरै ठाउँमा आज पनि सामान्य वर्षा तथा उच्च पहाडी र हिमाली क्षेत्रमा हल्का हिमपात हुन सक्ने सम्भावना छ । पहाडी भागमा बदली रहे पनि बाँकी भूभागमा मौसम सफा रहने अनुमान गरिएको छ ।
आज दिउँसो कोशी, बागमती र गण्डकी प्रदेशमा सामान्यतया बदली रहने, मधेश प्रदेशलगायत अन्य प्रदेशका पहाडी भागमा आंशिक बदली रहने तथा बाँकी भागमा मौसम मुख्यतया सफा रहनेछ । यस्तै, आज राति पनि यी प्रदेशका पहाडी भागमा आंशिक बदली रहने र बाँकी भूभागमा मौसम सफा रहने महाशाखाले जनाएको छ ।
यसपालि कात्तिक दोस्रो हप्तामा मोन्था चक्रवात, अरब सागरको प्रणाली र पश्चिमी वायुका कारण देशका धेरै ठाउँमा वर्षा हुँदा धानबालीमा ठूलो क्षति पुगेको छ । हिमपातका कारण उच्च हिमाली क्षेत्रका गतिविधि र पदयात्रा समेत प्रभावित भएका छन् ।
