ओमानमा जारी आईसीसी पुरुष टी–२० विश्वकप एसिया तथा इस्ट एसिया–प्यासिफिक छनोटको सुपर सिक्स चरणमा नेपालले लगातार दोस्रो जित हासिल गरेको छ।
अल अमिरतस्थित ओमान क्रिकेट एकेडेमी टर्फ–१ मा गएराति भएको खेलमा नेपालले कतारलाई पाँच रनले पराजित गरेको हो। यसअघि आइतबार भएको पहिलो खेलमा नेपालले संयुक्त अरब इमिरेट्स (यूएई)लाई एक रनले हराउँदै रोमाञ्चक जित दर्ता गरेको थियो।
टस हारेर पहिले ब्याटिङ गरेको नेपालले निर्धारित २० ओभरमा नौ विकेट गुमाउँदै १४७ रनको योगफल बनायो। कप्तान रोहित पौडेलले उत्कृष्ट प्रदर्शन गर्दै ५८ रनको योगदान दिए। त्यस्तै दीपेन्द्रसिंह ऐरीले २६ रन र गुल्शन झाले १६ रन जोडे।
लक्ष्यका क्रममा कतार १९.५ ओभरमा १४२ रनमा अलआउट भयो। कतारका ओपनर इमाल लियानागेले ३५ बलमा सर्वाधिक ५५ रन बनाए भने जुबेर अलीले ५२ रनको योगदान दिए।
नेपालका स्पिनर सन्दीप लामिछाने खेलका हिरो बने-उनले ३ ओभर ५ बल बलिङ गर्दै १८ रन खर्चेर ५ विकेट लिए। यो उनको टी-२० अन्तर्राष्ट्रिय करियरमा दोस्रो पटक हो, जब उनले एकै खेलमा पाँच विकेट लिएका छन्। नन्दन यादवले दुई विकेट लिए भने दीपेन्द्रसिंह ऐरीले एक विकेट झारे।
कतारका लागि कप्तान मिर्जा बेग र डानियल लुइसले समान तीन–तीन विकेट लिए भने मुहम्मद असिमले एक विकेट झारे।
समूह ‘बी’को विजेताका रूपमा सुपर सिक्समा पुगेको नेपालले यसअघि समूह चरणमा कुवेत र जापानलाई पराजित गरेको थियो।
