बित्थडचिर गाउँपालिकामा द्याची मेला सम्पन्न, १० हजारभन्दा बढीको सहभागिता

बझाङ- बझाङको बित्थडचिर गाउँपालिका–२ स्याँडीमा लाग्ने धार्मिक, सांस्कृतिक तथा ऐतिहासिक द्याची मेला सम्पन्न भएको छ। परम्परादेखि मनाइँदै आएको यो मेला यस वर्ष पनि भव्यताका साथ सम्पन्न भएको हो।
ललिता गौराको उपमा दिइएको यस मेलामा विभिन्न गाउँबाट जात्रा आउने, भगवतीको विशेष पूजा–आराधना गर्ने, सबै देउताका धामी काप्ने तथा डेउडा, फाग, शिवलिंग चैत, धमारीलगायतका धार्मिक खेल प्रदर्शन गर्ने परम्परा रहिआएको छ। मेलाको मुख्य आकर्षण छलिया खेल, दाइनो नचाउने र धामी काप्ने मानिन्छ।
मेलाका विशेष करिया बित्थडचिर गाउँपालिका–१, २, ३, ४ र ५ का स्थानीय मानिन्छन्। यस मेलामा विवाहित महिलाहरू व्रत बस्ने, दुबधालो लगाउनेजस्ता धार्मिक कार्य गर्ने परम्परा पनि छ। मेला भर्नका लागि बित्थडचिर गाउँपालिका, बुङ्गल नगरपालिका, केदारस्युँ गाउँपालिका साथै छिमेकी बैतडी, डडेल्धुरा र डोटी जिल्लाबाट समेत उल्लेखनीय संख्यामा भक्तजन सहभागी हुने गरेका छन्।
गौरा पर्व परम्परागत रूपमा भाद्र शुक्ल पञ्चमीदेखि अष्टमीसम्म मनाइन्छ। तर स्याँडी क्षेत्रमा एक समय ७ वर्षसम्म विभिन्न कारणले गौरा रोकिएको थियो। त्यसपछि धामीसँग गरिएको सोधपुछमा नवरात्रिको पञ्चमीका दिन द्याची मेला अर्थात् ललिता गौरा मनाउन सुझाव दिएपछि द्याची मेला मनाउन लागेको शिक्षक तथा स्थानीय मुरलीधर अवस्थीले बताए। त्यसयता त्यहाँका स्थानीयले हरेक वर्ष आश्विन शुक्ल पञ्चमीमा विधिवत् रूपमा हरेक वर्ष द्याची मेला मनाउँदै आएका छन्।
द्याची मेला धार्मिक र सांस्कृतिक मात्र नभई स्थानीयका लागि व्यापारीक अवसर पनि हो। मेलामा स्थानीय उत्पादनलाई राम्रो बजार पाइने भएकाले यसले स्थानीय अर्थतन्त्रमा समेत योगदान पुर्‍याउने गरेको छ। आपसी सद्भाव बढाउने र भगवतीको पूजा आराधनाले सुख–शान्ति प्राप्त हुने विश्वाससहित मनाइने यस मेलामा यस वर्ष १० हजारभन्दा बढी दर्शकको उपस्थिति रहेको वडाध्यक्ष मानबहादुर बोहराले जानकारी दिए