कञ्चनपुर— महेन्द्रनगरस्थित जिल्ला कारागार कञ्चनपुरमा क्षमता भन्दा तेब्बर बढी कैदीबन्दी राखिएको छ। १६० जनाको क्षमता रहेको कारागारमा हाल ४५६ जना कैदीबन्दी रहेका छन्, जसमा २७ महिला र २६ जना भारतीय नागरिक रहेका छन्।
कारागार कार्यालयका निमित्त प्रमुख रामदत्त जोशीका अनुसार, हाल सबैभन्दा बढी १६७ जना लागुऔषधसम्बन्धी मुद्दाका कैदीबन्दी छन्। “क्षमताभन्दा बढी बन्दी भएकाले पाल र टिनको सहायताले व्यवस्थापन गरिएको छ,” उनले बताए। उनका अनुसार, गत पुसमा बन्दी सङ्ख्या ५८० पुगेको थियो भने पछिल्लो समय अदालतबाट फैसला छिटो हुने क्रम बढेसँगै बन्दी घटेका छन्।
जिल्ला प्रहरी कार्यालयका प्रवक्ता प्रहरी नायव उपरीक्षक सागर बोहराका अनुसार, लागुऔषध दुरुपयोगले चोरी, ठगी, जबरजस्ती करणीदेखि हत्या प्रयाससम्मका घटना बढाएको छ। “सहज पहुँच र साथीसँगको संगतका कारण लागुऔषध प्रयोगकर्ताको संख्या बढ्दो छ,” उनले भने।
कारागारमा हाल महिला हिंसा, चोरी, ठगी, बलात्कार र ज्यान मार्ने उद्योगसम्बन्धी विभिन्न मुद्दाका कैदीबन्दी पनि रहेका छन्।
