भक्तपुर– राष्ट्रिय परीक्षा बोर्डले यही वैशाख ११ गतेबाट सुरु हुने कक्षा १२ को परीक्षा पूर्वनिर्धारित तालिकाअनुसार यथावत् सञ्चालन हुने स्पष्ट पारेको छ।
शिक्षक आन्दोलनका कारण परीक्षा स्थगित भएको भन्ने भ्रामक सूचना सामाजिक सञ्जालमा फैलिएको भन्दै बोर्डले यस्तो प्रचारप्रति गम्भीर आपत्ति जनाउँदै विद्यार्थीलाई भ्रममा नपरी तयारीमा जुट्न आग्रह गरेको छ।
बोर्डले शुक्रबार विज्ञप्ति जारी गर्दै परीक्षा स्थगित भएको भनेर सामाजिक सञ्जालमा प्रचार गरिएको सूचनालाई अनाधिकृत बताएको छ। बोर्डको लेटरप्याड र अध्यक्षको हस्ताक्षर नक्कली प्रयोग गरेर यस्तो सूचना सार्वजनिक गरिएको भन्दै बोर्डले दोषीमाथि साइबर कानुनअनुसार कारबाही प्रक्रिया अघि बढाइएको जानकारी दिएको छ।
साथै, परीक्षा शान्तिपूर्ण र व्यवस्थित रूपमा सञ्चालन गर्न अभिभावक, शिक्षक र विद्यालय प्रधानाध्यापकलाई समन्वय र सहकार्य गर्न पनि बोर्डले अपिल गरेको छ।
बोर्डले सूचना केवल आफ्नो आधिकारिक वेबसाइटबाट मात्र हेर्न अनुरोध गर्दै अन्य माध्यमबाट आएको जानकारीप्रति विश्वास नगर्न विद्यार्थी, अभिभावक र सरोकारवालालाई आग्रह गरेको छ।
