कैलाली, बैशाख ५ – जिल्ला प्रहरी कार्यालय कैलालीको अपराध अनुसन्धान टोलीले ८ ग्राम ८० मिलिग्राम खैरो हिरोइनसहित दुई जनालाई पक्राउ गरेको छ।
आज मिति २०८२ साल बैशाख ५ गते, अन्दाजी ३:३० बजे, धनगढी उप-महानगरपालिका वडा नम्बर १३, राजपुरस्थित सडक खण्डमा चेकजाँचको क्रममा जिल्ला प्रहरी कार्यालय कैलालीबाट प्र.ना.नि. गजेन्द्र बहादुर चन्दको कमाण्डमा खटिएको टोलीले लु.प.प्र. ०१००१ प ९२७८ नम्बरको मोटरसाइकल जाँच गर्ने क्रममा लागु औषधसहित उनीहरूलाई नियन्त्रणमा लिएको हो।
पक्राउ पर्नेमा मोटरसाइकल चालक नवलपरासीको पालिनन्दन गाउँपालिका वडा नं. ४ निवासी २८ वर्षीय अंकित कुमार निगम बानिया र पछाडि सवार बाजुराको त्रिवेणी नगरपालिका वडा नं. ८ निवासी २५ वर्षीय मेकेन्द्र गिरी रहेका छन्।
प्रहरीका अनुसार गिरीले बोकेको झोलाबाट ८ ग्राम ८० मिलिग्राम खैरो हिरोइन फेला परेको हो। दुबै जनालाई मोटरसाइकलसहित नियन्त्रणमा लिई हिरासतमा राखिएको र आवश्यक अनुसन्धान कार्य जारी रहेको जिल्ला प्रहरी कार्यालय कैलालीले जनाएको छ।
