काठमाडौ- प्रेस सेन्टर नेपालको ५ औं राष्ट्रिय महाधिवेशनबाट अध्यक्षमा कमल गिरी निर्वाचित भएका छन् । काठमाडौंको थापागाउँस्थित एक पार्टी भेन्यूमा सम्पन्न मतदानबाट प्रतिस्पर्धी उम्मेदवार दीपेन्द्र रावललाई १ सय ९१ मतान्तरलेपछि पार्दै गिरी निर्वाचित भएका हुन् । अध्यक्षमा निर्वाचित गिरीले ३ सय ६६ मत प्राप्त गर्दा रावलले १ सय ७५ मत प्राप्त गरे । गिरी यस अघि वरिष्ठ उपाध्यक्ष थिए भने रावल उपाध्यक्ष थिए ।
यस्तै वरिष्ठ उपाध्यक्षमा सुरेशचन्द्र अधिकारी निर्वाचित भएका छन् । अधिकारीले अर्का उम्मेदवार सुदिप बर्देवालाई २ सय ८६ मतान्तरले पछि पार्दै वरिष्ठ उपाध्यक्षमा निर्वाचित भएका हुन् । निर्वाचित अधिकारीले ३ सय ९७ मत प्राप्त गर्दै बर्देवाले भने १ सय ११ मत प्राप्त गरेका थिए । अधिकारी यस अघि उपाध्यक्ष थिए भने बर्देवा केन्द्रीय सदस्य मात्रै थिए ।
संगठनमा ५ जना उपाध्यक्ष भने निर्विरोध निर्वाचित भएका छन् । उपाध्यक्ष खुलामा रामसिंह ठगुन्ना, लक्ष्मण खड्का र विवेक गौतम, उपाध्यक्ष महिलामा शान्ता अधिकारी र उपाध्यक्ष समावेशीमा दीपक श्रेष्ठ निर्विरोध निर्वाचित भएका छन् । उपाध्यक्ष चयन भएका ५ जनामा अधिकारी सचिव, श्रेष्ठ उपमहासचिव र बाँकी ३ जना यस अघि पनि उपाध्यक्ष नै थिए ।
संगठनको महासचिवमा मनोज घर्तीमगर निर्वाचित भएका छन् । उनले अर्का उम्मेदवार दीपेन्द्र शर्मालाई २ सय ३१ मतान्तरले पछि पार्दै महासचिव निर्वाचित भएका हुन् । निर्वाचित घर्तीमगरले ३ सय ७९ मत प्राप्त गर्दा शर्माले १सय ४८ मत प्राप्त गरेका छन् ।
यस्तै उपमहासचिव खुलामा ज्ञानप्रसाद पौडेल निर्वाचित भएका छन् । उनले पनि निकटतम प्रतिस्पर्धी बोमलाल गिरीलाई ९ मतान्तरले पछि पार्दै निर्वाचित भएका हुन् । उपमहासचिव महिलामा लक्ष्मी आचार्य, उपमहासचिव दलितमा हरिश बिक, उपमहासचिव मधेशीमा अनिल मिश्र, उपमहासचिव आदिवासी जनजातिमा बुद्ध लोप्चन निर्विरोध निर्वाचित भएका छन् ।
सचिव खुलामा सुरेन्द्र चालिसे र सन्तोष देउजा निर्वाचित भएका छन् भने सचिव महिलामा अञ्जली थापा, सचिव समावेशीमा अवतार राई निर्वाचित भएका निर्वाचन समितिले जनाएको छ । यस्तै प्रदेशबाट निर्वाचित हुने सचिवमा कोशी प्रदेशबाट दीपेन्द्रकुमार राई, मधेश प्रदेशबाट सुनिता बराल, बागमती प्रदेशबाट मीनकुमार दाहाल, गण्डकी प्रदेशबाट दीपक भट्टराई, लुम्बिनी प्रदेशबाट मानसिंह बिक, कर्णाली प्रदेशबाट गणेशकञ्चन भारती, सुदूरपश्चिम प्रदेशबाट राजेन्द्र अवस्थी निर्विरोध निर्वाचित भएका छन् । भूगोल बाहेक उपत्यका प्रदेशबाट नवराज दाहाल, प्रतिष्ठान प्रदेशबाट केशव भुल र एसोसियट प्रदेशबाट नन्दलाल तिवारी निर्विरोध निर्वाचित भएका छन् ।
कोषाध्यक्षमा भएको निर्वाचनमा वसन्त गिरी निर्वाचित भएका छन् । उनले अर्का उम्मेदवार डा: डक्टप्रसाद धिताललाई १ सय ४८ मतान्तरले पछि पार्दै निर्वाचित भएका हुन् । निर्वाचित गिरीले ३ सय ३५ मत प्राप्त गर्दा धितालले भने १ सय ८७ मत प्राप्त गरेका छन् ।
पदाधिकारी बाहेक प्रदेशबाट आउने केन्द्रीय सदस्य, आरक्षणबाट आउने केन्द्रीय सदस्य, विभिन्न आयोगका पदाधिकारी एवं सदस्य पनि निर्विरोध निर्वाचित भएका छन् । निर्वाचन समितिका संयोजक गोविन्द आचार्यका अनुसार २९ जनाको पदाधिकारीमा अध्यक्ष, वरिष्ठ उपाध्यक्ष तथा महासचिव सहित विभिन्न १२ पदमा प्रतिस्पर्धाबाट निर्वाचित भएका छन् । उनले १७ जना पदाधिकारी निर्विरोध निर्वाचित भएका छन् ।
यस्तै लेखा समितिको संयोजकमा अमृतराज तिवारी र सचिवमा भीम राई, अनुशासन समिति संयोजकमा गुनाराम घिमिरे र सचिवमा कृष्ण लेकाली निर्विरोध निर्वाचित भएका निर्वाचन समितिले जानकारी दिएको छ । प्रेस सेन्टर नेपालको पाँचौँ महाधिवेशनको शनिवार पूर्व प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल प्रचण्डले उद्घाटन गरेका थिए । प्रेस सेन्टर नेपालको इतिहासमा पहिलो पटक निर्वाचन प्रक्रियाबाट नेतृत्व चयन भएको हो । निर्वाचनमा हेडक्वार्टर (एचक्यू) को तर्फबाट गिरी नेतृत्वको टिम प्रतिस्पर्धामा थियो भने जनार्दन शर्मा नेतृत्वको टिमबाट रावल प्रतिस्पर्धामा थिए ।
प्रेस सेन्टर नेपालको आयोजक समिति, प्रदेश पदाधिकारी, जिल्ला अध्यक्ष, प्रतिनिधि र बाह्य मोर्चाका गरेर ८ सय २१ जना प्रतिनिधि रहेकोमा ६७ प्रतिशत अर्थात् ५ सय ५१ मत खसेको थियो ।
