काठमाडौँ- राजावादीले काठमाडौंको तीनकुने क्षेत्रको एक घरमा आगो लगाउँदा जलेर एकजना पत्रकारको मृत्यु भएको छ ।
तीनकुनेस्थित एक घरमा प्रदर्शनकारी लगाएको आगोमा परी एभिन्यूज टेलिभिजनमा कार्यरत सुरेश रजकको जलेर मृत्यु भएको हो । घटनास्थलमा रहेका एक एभिन्यूजकर्मीले यसको पुष्टि गरे । उनले भने, ” भवनमा हाम्रो साथी फसेको जानकारी गराउँदा पनि प्रहरीले बेवास्ता गर्यो । प्रहरीको लापरबाहीको कारण घटना घटेको हो ।”
उक्त घरमा लगाइएको आगो निभाएपछि रजकको शव जलेको अवस्थामा भेटिएको हो ।
अहिले प्रहरी पसेर घटनास्थल जाँच प्रकृति मुचुल्का उठाइरहेको छ । प्रहरीसँगको झडपपछि तीनकुने क्षेत्रमा अवस्थित उक्त मार्बल हाउसमा आगजानी गरिएको थियो । उनी विगत ५ वर्षदेखि क्यामरा पर्सनको रूपमा एभिन्युज टेलिभिजनमा कार्यरत थिए।
