धनगढी- खसीको मासु भन्दै बाख्राको मासु बेच्ने डडेल्धुराका १ जना पक्राउ परेका छन्। जिल्लाको अजयमेरु गाउँपालिका- २ घर भई हाल अमरगढी नगरपालिका-५ तुफानडाँडा बसेर व्यवसाय गर्दै आएका ४५ वर्षीय मानबहादुर बोहरा उक्त आरोपमा पक्राउ परेका हुन्।
बोहराले तुफानडाँडामा एमबी मासु पसल सञ्चालन गर्दै आएका थिए। उनले बाख्रा काटिरहेको भन्ने गोप्य सूचनाको आधारमा प्रहरीले छापा हानेको थियो। उनको पसलबाट ३१ दशमलब २२० किलोग्राम तौल भएको बाख्रा काटिरहेको अवस्थामा फेला पारेर बाख्रासहित नियन्त्रणमा लिएको जिल्ला प्रहरी कार्यालय डडेल्धुराका प्रहरी निरीक्षक उपेन्द्र बमले जानकारी दिए। इन्सपेक्टर बमका अनुसार बोहरालाई नियन्त्रणमा लिएर प्रहरीले थप अनुसन्धान गरिरहेको छ।
