पोखरा, १७ माघ – तामाङ समुदायको महान् पर्व २८६१ औं सोनाम ल्होसार को अवसरमा गण्डकी प्रदेशका प्रमुख डिल्लीराज भट्ट ले शुभकामना सन्देश दिनुभएको छ।
प्रदेश प्रमुख भट्टले सोनाम ल्होसारलाई आपसी सद्भाव, प्रेम, भातृत्व, सहिष्णुता र एकताको पर्व भन्दै यसले नेपालको मौलिक संस्कृतिको संरक्षण तथा सम्बर्द्धनमा महत्वपूर्ण योगदान पु¥याउने उल्लेख गर्नुभयो।
शुभकामना सन्देशमा उहाँले भन्नुभएको छ, “बहुजातीय, बहुभाषिक, बहुसांस्कृतिक विविधतायुक्त नेपाली समाजमा सोनाम ल्होसार जस्ता पर्वहरूबाट सबै नेपालीबीच आपसी सद्भाव, सहिष्णुता र बन्धुत्वको भावना अभिवृद्धि हुनाका साथै बृहत् राष्ट्रिय एकतालाई थप सुदृढ गर्न मद्दत पुग्नेछ भन्ने विश्वास लिएको छु।”
साथै, उहाँले यो पर्वले सबै नेपालीबीचको एकतालाई अझ सुदृढ गर्दै आर्थिक र सामाजिक रूपले समृद्ध मुलुक निर्माण गर्नका लागि उर्जा प्रदान गरोस्भन्ने कामना गर्नुभएको छ।
तामाङ समुदायको नयाँ वर्ष को रूपमा मनाइने सोनाम ल्होसार माघ शुक्ल प्रतिपदाको दिन मनाइन्छ। मुलुकका विभिन्न स्थानमा बसोबास गर्ने तामाङ समुदायका साथै ह्योल्मो, थकाली, जिरेल, नेस्याङ्वा, भोटे, दुरा, लेप्चा लगायतका जातिहरूले पनि आ–आफ्नै परम्परा अनुसार यो पर्व मनाउने गर्छन्।
यस अवसरमा तामाङ समुदायले कुल पूजा, प्रकृति पूजा र बुद्धका सन्देशको स्मरण गर्नुका साथै आफन्तजन भेला भई मनोरञ्जन गर्दै खुसी आदानप्रदानगर्ने परम्परा रहिआएको छ।
