धनगढी-२, मिलन चोकस्थित लिटल फ्लावर बोर्डिङ हाई स्कुल र धनगढी-४, उत्तर बेहदीस्थित नवजीवन अस्पतालबीच विद्यार्थी, शिक्षक, कर्मचारी, अभिभावक, र स्कुलसँग सम्बन्धित व्यक्तिहरूका लागि विशेष उपचार छुट प्रदान गर्ने सम्झौता भएको छ।
सम्झौतामा लिटल फ्लावर बोर्डिङ हाई स्कुलका प्रधानाध्यापक विवेक भट्ट, नवजीवन अस्पतालका मेडिकल निर्देशक डा. विदुर मणि ढकाल, र सीईओ चक्र खडायतले हस्ताक्षर गरेका हुन्।
प्रधानाध्यापक भट्टले भने, “गुणस्तरीय शिक्षा मात्र नभई स्वास्थ्य सेवामा पनि योगदान पुर्याउने उद्देश्यले यो सहकार्य गरिएको हो। यसले विद्यार्थी र उनीहरूका परिवारहरूको स्वास्थ्यलाई पनि सहयोग पुर्याउने विश्वास लिएका छौं।”
सम्झौताअनुसार, लिटल फ्लावर बोर्डिङ हाई स्कुलका विद्यार्थी, शिक्षक-शिक्षिका, कर्मचारी, र अभिभावकहरूले स्कुलको सिफारिसपत्र वा परिचयपत्रको आधारमा नवजीवन अस्पतालमा उपचार गराउँदा १० प्रतिशतदेखि ५० प्रतिशतसम्मको छुट पाउनेछन्।
नवजीवन अस्पतालका मेडिकल निर्देशक डा. ढकालका अनुसार, “समाजसेवा र सहुलियतपूर्ण स्वास्थ्य सेवा उपलब्ध गराउने हाम्रो उद्देश्यलाई यो सम्झौताले थप प्रोत्साहन दिनेछ।”
सम्झौताअनुसार उपलब्ध छुट सूची:
1.ओ.पी.डी.: ५० प्रतिशत छुट
2.ओ.टी. (शल्यक्रिया): १० प्रतिशत छुट
3.एम.आर.आई. र सिटी स्क्यान: १० प्रतिशत छुट
4.एन.आई.सी.यू./पी.आई.सी.यू.: १० प्रतिशत छुट
5.ल्याब र रेडियोलोजी: १० प्रतिशत छुट
6.एक्स-रे र माइनर प्रोसेस: १० प्रतिशत छुट
लिटल फ्लावर बोर्डिङ हाई स्कुलले सामाजिक उत्तरदायित्वलाई ध्यानमा राख्दै आगामी दिनमा पनि यस्तै क्रियाकलापलाई प्राथमिकता दिने प्रतिबद्धता व्यक्त गरेको छ।
