कैलाली, माघ ६:कैलाली प्रहरीले १२ ग्राम ४६० मिलिग्राम खैरो हेरोइनसहित तीनजनालाई पक्राउ गरेको छ। जिल्ला प्रहरी कार्यालय, कैलालीबाट खटिएको टोलीले शनिबार विभिन्न स्थानबाट लागुऔषधसहित उनीहरूलाई नियन्त्रणमा लिएको हो।
प्रहरीका अनुसार, धनगढी उप-महानगरपालिका वडा नं. २, भन्सार ब्यारेल क्षेत्रमा मोटरसाइकल (सु.प.प्र.०२००३ प ६११५) जाँच गर्ने क्रममा २४ वर्षीय अनिल लामा तामाङ र १८ वर्षीय नवीन कुमार ऐरको साथबाट १२ ग्राम ३६० मिलिग्राम खैरो हेरोइन बरामद भएको छ। उनीहरू भारतबाट नेपालतर्फ आउँदै गरेका थिए।
यस्तै, प्रहरी टोलीले धनगढी उप-महानगरपालिका वडा नं. १, अस्पताल रोडबाट शंका लागि जाँच गर्दा डडेल्धुरा, अजयमेरु गाउँपालिका वडा नं. ५ घर भई हाल अस्पताल रोडमा बस्दै आएका २० वर्षीय निरञ्जन पन्तको साथबाट १०० मिलिग्राम खैरो हेरोइन बरामद गरेको छ।
पक्राउ परेकाहरूबाट बरामद लागुऔषधको कुल तौल १२ ग्राम ४६० मिलिग्राम रहेको छ। पक्राउ परेका तीनैजनालाई नियन्त्रणमा राखी थप अनुसन्धान भइरहेको जिल्ला प्रहरी कार्यालय कैलालीले जनाएको छ।
लागुऔषध ओसारपसार र बिक्रीवितरणविरुद्ध कडा अभियान सञ्चालन गर्दै आएको प्रहरीले सर्वसाधारणलाई शंकास्पद गतिविधि देखिएमा तुरुन्त जानकारी गराउन अपिल गरेको छ।
