कैलाली, पुस २१
जिल्ला प्रहरी कार्यालय कैलालीको टोलीले लागुऔषध कारोबारमा संलग्न भएको आरोपमा एक व्यक्तिलाई पक्राउ गरेको छ।
इलाका प्रहरी कार्यालय टिकापुरबाट खटिएको टोलीले पुस २० गते बेलुकी ५:३० बजे टिकापुर नगरपालिका वडा नं. ९ बालुवाटारस्थित सडक खण्डमा से ६ प ९०६३ नम्बरको मोटरसाइकल चेकजाँच गर्दा उक्त व्यक्तिसँग लागुऔषध फेला पारेको हो।
मोटरसाइकल चालक जानकी गाउँपालिका वडा नं. ९, पूर्व खैरीफाँटाका २० वर्षीय निरज जैसीलाई शंका लागि प्रहरीले रोकी चेकजाँच गर्दा मोटरसाइकलको दुवै साइड इन्डिकेटर भित्र लुकाई राखिएको ७ ग्राम २६० मिलिग्राम खैरो हिरोइन जस्तो देखिने धुलो पदार्थ फेला परेको प्रहरीको भनाइ छ।
प्रहरीले लागुऔषधसहित मोटरसाइकलसमेत बरामद गरी निरज जैसीलाई नियन्त्रणमा लिएको छ। हाल उनलाई इलाका प्रहरी कार्यालय टिकापुरको हिरासतमा राखी थप अनुसन्धान भइरहेको जनाइएको छ।
प्रहरीले पछिल्लो समय लागुऔषधको ओसारपसारमा निगरानी र कडाइ गरेको जनाएको छ।
