धनगढी, पुस १४ – कैलालीको धनगढीमा पुस १४ गतेदेखि १६ गतेसम्म निता स्मृति राष्ट्रिय उसु प्रतियोगिता हुने भएको छ। सुदूरपश्चिम प्रदेश खेलकुद परिषद्को सहयोग र सुदूरपश्चिम प्रदेश उसु संघको आयोजनामा सान्सौं विधामा सिनियर र जुनियर स्तरका खेलहरु आयोजना गरिने छन्।
सुदूरपश्चिम प्रदेश उसु संघका कार्यवाहक अध्यक्ष राजिव गुप्ताका अनुसार, प्रतियोगितामा सातवटा प्रदेश र तीनवटा विभागीय टोली गरी १० टिम सहभागी हुने छन्। सिनियरतर्फ पुरुषमा सात र महिलामा छ तौल समूहमा प्रतिस्पर्धा हुनेछ भने जुनियरतर्फ पुरुष र महिलाका चार-चार तौल समूहमा खेल हुनेछन्।
८८ पदकका लागि प्रतिस्पर्धा
प्रतियोगितामा २२ स्वर्ण, २२ रजत, र ४४ कास्य पदकका लागि प्रतिस्पर्धा हुनेछ। सिनियरतर्फ प्रथम हुने टिमलाई नगद ५० हजार रुपैयाँ, दोस्रो हुनेलाई ३० हजार रुपैयाँ, र तेस्रो हुनेलाई २० हजार रुपैयाँ प्रदान गरिनेछ। यस्तै, जुनियरतर्फ प्रथम, दोस्रो, र तेस्रो हुने टिमलाई क्रमशः २५ हजार, १५ हजार, र १० हजार रुपैयाँ नगदसहित पदक दिइनेछ।
प्रतियोगितामा १९६ खेलाडी सहभागी हुने
यो प्रतियोगितामा १९६ जना खेलाडीले प्रतिस्पर्धा गर्नेछन्। आयोजकका अनुसार प्रतियोगिता आयोजना गर्न ४८ लाख २५ हजार रुपैयाँ खर्च लाग्ने अनुमान गरिएको छ।
निता खड्काको सम्झनामा यो प्रतियोगिता आयोजना गर्न लागिएको हो। धनगढी उपमहानगरपालिका-१२, जुगेडाकी १८ वर्षीया उसु खेलाडी निता खड्काको केही समयअघि सवारी दुर्घटनामा दुखद निधन भएको थियो।
प्रतियोगिताले सुदूरपश्चिमका खेलाडीहरूलाई प्रेरणा प्रदान गर्ने आयोजकको विश्वास छ।
