अछाम । नेकपा एमालेका पूर्व उपाध्यक्ष डा. भीम रावलले आफूलाई कारबाहि गरेर देखाउन अध्यक्ष केपी शर्मा ओलीलाई चुनौती दिनुभएको छ ।
साँफेबगरमा आज प्रेस चौतारी नेपाल अछामले आयोजना गरेको पत्रकार भेटघाट कार्यक्रमलाई सम्बोधन गर्दै उहाँले आफूलाई कारबाहि गरेर देखाउन चुनौती दिनुभएको हो ।
देश, जनता र पार्टीले लिएको नीतिको पक्षमा आफू दृढता पूर्वक खडा भएको केही मानिसहरूलाई बिझाई रहेको भन्दै नेता रावलले त्यस्ता पात्र र प्रवृत्तिलाई चुनौती दिन आफू सक्षम रहेको दाबी गर्नुभयो ।
नेकपा एमालेको चितवन महाधिवेशनमा केपी शर्मा ओलीसँग अध्यक्ष पदमा पराजीत रावल हाल पार्टीमा भूमिका विहीन हुनुहुन्छ । पार्टीमा रावललाई उचित स्थान दिनु पर्ने माग उठ्दै आए पनि पार्टी नेतृत्वले बेवास्ता गर्दै आएको छ ।
