अमेरिकी राष्ट्रपति डोनाल्ड ट्रम्पले चीनबाट अमेरिका आउने सामानमा थप १०० प्रतिशत भन्सार लगाउने घोषणा गर्नुभएको छ।
ट्रम्पले आफ्नो ट्रुथ सोसल अकाउन्टमार्फत पोस्ट गर्दै यसअघि लगाइँदै आएको ३० प्रतिशत भन्सारमा थप सय प्रतिशत बढाउने घोषणा गर्नुभएको हो।
अब चीनबाट अमेरिका आयात हुने सामानमा कुल १३० प्रतिशत भन्सार लाग्ने भएको छ। ट्रम्पले उक्त निर्णय नोभेम्बर १ देखि लागू हुने बताएका छन्।
अब चीनमाथि उनीहरूले अहिले तिरिरहेको भन्सारबाहेक थप सय प्रतिशत भन्सार लगाइनेछ,’ ट्रम्पले लेख्नुभएको छ, ‘नोभेम्बर १ देखि हामी सबै प्रकारका महत्वपूर्ण सफ्टवेयरहरूमा पनि निर्यात नियन्त्रण लागू गर्नेछौँ,’ उहाँको भनाइ छ।
ट्रम्पले आफ्नो दोस्रो कार्यकाल सुरु भएलगत्तै चीनसँग व्यापार युद्ध थालेका थिए। त्यतिबेला अमेरिकाले चीनमाथि १४५ प्रतिशतसम्म भन्सार लगाएको थियो। चीनले पनि १२५ प्रतिशत जबाफी भन्सार लगाएर प्रत्युत्तर दिएको थियो।
पछिल्लो तनावपछि स्वीटजरल्याण्डमा भएको वार्तामा दुवै देशले भन्सार ११५ प्रतिशत बिन्दुले घटाउने सहमति गरेका थिए।
यसबीच अमेरिकी सञ्चारमाध्यम सिएनएनका अनुसार ट्रम्प र चिनियाँ राष्ट्रपति सी चिनफिङबीच अक्टोबरको अन्त्यमा दक्षिण कोरियामा हुने एशिया प्यासिफिक इकोनोमिक कोअपरेसन (APEC) शिखर सम्मेलनमा भेट हुने तय भएको छ।
तर सो भेटअघि चीनले दुर्लभ खनिज पदार्थको निर्यातमा पुनः कडाइ गरेपछि ट्रम्पले पुनः व्यापार युद्ध सुरु गरेको बताइएको छ।
सुरुमा चीनले दुर्लभ खनिज पदार्थको प्रत्यक्ष निर्यातमा मात्र रोक लगाएको थियो। तर अब ती पदार्थ प्रयोग गरी अन्य देशमा बनेका वस्तु निर्यात गर्न पनि चीनको वाणिज्य मन्त्रालयबाट अनुमति लिनुपर्ने नियम ल्याइएको छ।
चीनको वाणिज्य मन्त्रालयले बिहीबार जारी गरेको विज्ञप्तिमा भनिएको छ, राष्ट्रिय सुरक्षा र हितको रक्षा गर्न चिनियाँ दुर्लभ खनिज प्रयोग गरिएका सामान निर्यात गर्न मन्त्रालयबाट इजाजतपत्र अनिवार्य हुनेछ।’
नयाँ प्रतिबन्ध कसरी लागू हुनेछ भन्ने भने अझै स्पष्ट छैन। तर ब्लुमबर्गका अनुसार यो कदम अमेरिकाले चिनियाँ कम्पनीहरूलाई उच्च गुणस्तरका चिप्स र ती बनाउन प्रयोग हुने उपकरण खरिद गर्न रोक लगाएको प्रतिबन्धसँग मिल्दोजुल्दो छ।
केही महिनाअघि सिकागोस्थित फोर्ड मोटर कम्पनीको कारखानामा दुर्लभ खनिजको अभावमा उत्पादन रोकिएको थियो। अन्य अमेरिकी मोटर कम्पनीहरूमा पनि त्यस्तै जोखिम देखिएपछि ट्रम्पले जुन ५ मा राष्ट्रपति सीसँग ९० मिनेट टेलिफोन वार्ता गरेका थिए।
वार्ताका धेरै चरणपछि दुई देश सहमतिनजिक पुगेका थिए, तर अहिले पुनः तनाव बढेको छ। चीनले निर्यातमा कडाइ गरेर व्यापार सम्झौतामा मोलमोलाइ गर्न खोजेको विश्लेषण गरिएको छ।
पहिले नै लागू भइसकेको ३० प्रतिशत भन्सारमा थप सय प्रतिशत वृद्धि गर्ने ट्रम्पको निर्णयले महिनौंयता चलिरहेको अमेरिका–चीन व्यापारिक युद्धविराम तोडिएको छ।
विश्लेषकहरूका अनुसार ट्रम्पको ‘मनलाग्दी भन्सार नीति’ले अमेरिकी अर्थतन्त्रमा ठूलो जोखिम ल्याउन सक्छ।
उहाँले चाहेको बेलामा भन्सार बढाउने अधिकारबारे अमेरिकी सर्वोच्च अदालतले आगामी महिनामा निर्णय दिनेछ।
चिनियाँ राष्ट्रपति सी चिनफिङ भने यस्ता कानुनी सीमाबाट मुक्त छन्।
अहिलेसम्मका संकेतले देखाउँछ कि दुई ठूला अर्थतन्त्रबीचको यो नयाँ व्यापार युद्ध विश्व अर्थतन्त्रका लागि पुनः ठूलो चुनौती बन्न सक्छ।
