धनगढी, असार ८ – कैलालीको चुरे गाउँपालिका लाई आर्थिक वर्ष २०८२/०८३ का लागि पूर्णखोप सुनिश्चित तथा दिगोपना पालिका घोषणा गरिएको छ। आवश्यक सबै मापदण्ड तथा प्रक्रिया पूरा गरेपछि गाउँपालिकाले पूर्णखोप सुनिश्चितताको अवस्था हासिल गरेको हो।
गाउँपालिकाको नियमित कार्यक्रमअन्तर्गत ० देखि ५९ महिनासम्मका बालबालिकाको घरधुरी सर्वेक्षण गर्दा कुल १ हजार ४५२ जना बालबालिका पहिचान गरिएको थियो। सर्वेक्षणअनुसार १५ महिनामुनिका ३८८ जना बालबालिकाले नियमित खोप सेवा प्राप्त गरिरहेका छन् भने १६ देखि ५९ महिनासम्मका १ हजार ६४ जना बालबालिकाले १५ महिनाभित्र प्राप्त गर्नुपर्ने सम्पूर्ण खोप प्राप्त गरेको पुष्टि भएको गाउँपालिका स्वास्थ्य शाखाका जनस्वास्थ्य निरीक्षक बिक्रम बहादुर बोहरा ले जानकारी दिए।
पूर्णखोप सुनिश्चितता निर्देशिकाअनुसार आवश्यक सबै मापदण्ड पूरा गरेपछि गाउँपालिकाले यो उपलब्धि हासिल गरेको हो। गाउँपालिकाभित्रका सबै वडामा नियमित खोप सेवा सुदृढ गर्दै लक्षित उमेर समूहका बालबालिकालाई खोपको पहुँचमा ल्याउन स्वास्थ्यकर्मी, महिला स्वास्थ्य स्वयंसेविका, जनप्रतिनिधि तथा सरोकारवाला निकायहरूले सक्रिय भूमिका निर्वाह गरेका थिए।
जिल्ला पूर्ण खोप समन्वय समिति, कैलाली द्वारा प्रदान गरिएको प्रमाणपत्रमार्फत गाउँपालिकाले १६ देखि २३ महिनासम्मका बालबालिकालाई राष्ट्रिय खोप तालिकाअनुसार आवश्यक सबै खोप उपलब्ध गराई पूर्णखोप सुनिश्चित गरेको प्रमाणित भएको छ।
गाउँपालिकाले यस उपलब्धिलाई बालबालिकाको स्वास्थ्य सुरक्षातर्फको महत्वपूर्ण सफलता भएको जनाएको छ। साथै आगामी दिनमा नियमित खोप कार्यक्रमलाई अझ प्रभावकारी बनाउँदै कुनै पनि बालबालिका खोप सेवाबाट वञ्चित नहोस् भन्ने उद्देश्यका साथ समुदायस्तरमा सचेतना, निगरानी तथा अनुगमनका गतिविधिलाई निरन्तरता दिइने प्रतिबद्धता व्यक्त गरेको छ।
पूर्णखोप सुनिश्चितता तथा दिगोपना घोषणा बालबालिकाको स्वास्थ्य अधिकार सुनिश्चित गर्ने दिशामा चुरे गाउँपालिकाले हासिल गरेको महत्वपूर्ण उपलब्धिका रूपमा हेरिएको छ।
