धनगढी- बझाङको बुङ्गल नगरपालिकाभित्र रहेका नेपाल टेलिकमका टावरहरूमा विद्युतीकरण गर्ने विषयमा नगरपालिकाले नेपाल टेलिकमसँग छलफल गरेको छ। सोमबार नगरप्रमुख जयबहादुर धामीले प्रादेशिक कार्यालय अत्तरिया पुगेर नेपाल टेलिकमका प्राविधिक शाखा प्रमुख आशिष बटाजुसँग भेटवार्ता गर्दै टावरहरूमा विद्युत आपूर्ति र नेटवर्क सुधारबारे विस्तृत छलफल गरेका हुन्।
नगरप्रमुख धामीले नगरपालिकामा देखिँदै आएको मोबाइल नेटवर्क समस्याको अन्त्यका लागि टेलिकमसँग समन्वय गरिएको जानकारी दिए। उनले टावरहरूमा विद्युत आपूर्ति भएपछि हाल देखिएका नेटवर्क समस्या क्रमशः समाधान हुँदै जाने विश्वास व्यक्त गरे।
छलफलका क्रममा बुङ्गल नगरपालिका–१० टुमेडा देउलिकोट क्षेत्रमा राष्ट्रिय प्रसारण लाइनमार्फत विद्युत विस्तार गर्नुपर्ने माग नगरपालिकाले राखेको थियो, जसप्रति नेपाल टेलिकम सकारात्मक देखिएको छ।
प्राविधिक शाखा प्रमुख बटाजुले विद्युतीकरणका लागि सहकार्य गर्ने प्रतिबद्धता जनाउँदै लाइन विस्तारका लागि आवश्यक तार उपलब्ध गराउने बताएका छन्। साथै, जेठ महिनाभित्रै टेलिकम टावरमा विद्युत लाइन जडान गर्ने सहमति भएको छ।
यस पहलसँगै बुङ्गल नगरपालिकामा सञ्चार सेवा अझ प्रभावकारी र भरपर्दो बन्ने अपेक्षा गरिएको छ। त्यस्तै क्रमशः अन्य टावरहरूमा पनि विद्युत लाइन बिस्तार गरिने जनाइएको छ ।
Advertisement
