काठमाडौं– जल तथा मौसम विज्ञान विभागका अनुसार हाल नेपालमा कुनै महत्वपूर्ण मौसमी प्रणाली सक्रिय छैन । त्यसैले देशका अधिकांश भागमा मौसम सामान्यतया सफा रहनेछ। पश्चिमी वायु कमजोर अवस्थामा रहेका कारण ठूलो मौसमी प्रभाव नदेखिएको विभागले जनाएको छ।
कोशी र गण्डकी प्रदेशका पहाडी तथा उच्च हिमाली भू–भागमा भने आंशिक बदली रहने र स्थानीय वायुको प्रभावका कारण केही स्थानमा हल्का वर्षा वा हिमपात हुन सक्ने सम्भावना छ। मधेश, बागमती, लुम्बिनी, कर्णाली र सुदूरपश्चिम प्रदेशका धेरैजसो स्थानमा मौसम सफा रहने विभागले बताएको छ।
विहान र बेलुकी केही स्थानहरूमा हल्का कुहिरो देखिए पनि दिउँसो मौसम खुलेर जाने अनुमान गरिएको छ। तापक्रम सामान्य दायरामै रहने भए पनि पश्चिमी तथा मध्य तराईमा बिहान चिसो महशुस हुने भएकाले आवश्यक सतर्कता अपनाउन विभागले आग्रह गरेको छ।
विभागका अनुसार आगामी केही दिनसम्म देशभर मौसम स्थिर रहने र हिमाली क्षेत्रमा हल्का वर्षा वा हिमपात दोहोरिन सक्ने अनुमान गरिएको छ।
