बझाङ : हिमाली जिल्ला बझाङका यार्सागुम्बा संकलकहरु हिमाली पाटनतिर जान थालेका छन् । यार्सागुम्बा टिप्न केहि समयपछि सुरु गर्ने भएपनि उपयुक्त बासस्थानको खोजी र यार्सागुम्बाको अवस्था हेर्न र बुझ्नको लागि उनिहरु हिमाली पाटनतिर लागेका हुन्
नयाँ वर्ष मनाए लगत्त्तै गाउँका आधा भन्दा बढी मानिसहरु लेकतिर गइसकेको सुर्मा गाउँपालिका –४ का स्थानिय लोक बहादुर बोहराले बताउनुभयो । पहिलो चरणमा लेकतिर जानेहरुले आजभोली पाटनतिर खानेबस्ने सबै व्यवस्था मिलाएर हिउँदेबाली भित्र्याउन फर्किने गरेको बोहराले बताउनुभयो ।
हिउँदेबाली भित्र्याएपछि वृद्धवृद्धा र साना बालबालिका बाहेक सबै यार्सागुम्बा संकलनको लागि लेकतिर जाने गर्दछन् । पछिल्लो समय यहाँ गहुँ भन्दापनि स्थानियहरुले आलु लगाउने गरेको र यसपालि खडेरीले लगाएको गहुँ पनि सुकेको अर्का स्थानिय हंशविर बोहराले बताउनुभयो । यहिँ वैशाख १५ को उवनिर्वाचनका लागि केहि मानिसहरु रोकिएका र उपचुनाव सकिए पछि सबै पाटनतिर गइसक्ने उहाँको भनाई छ । पानी परेपछि मात्रै यार्सा टिप्ने हुनाले पानी पर्ने आशामा कुरिरहेको बोहराले बताउनुभयो ।
यसपालि लेकतिर खासै हिउँ नपरेकाले स्थानियहरु यार्सा नपाइने चिन्तामा छन् । यार्सागुम्बा पाटनहरू फोहोरले भरिन थालेकाले पनि यार्सा नपाइने गरेको उनिहरुको भनाई छ । यार्सा संकलन कार्य सुरु भएपछि प्लास्टिक, सिसा, कपडा र पेय पदार्थका बोत्तलहरूले जिल्लाका उच्च हिमाली पाटनहरू भरिभराउ हुने गरेका छन् । बझाङमा यार्सा संकलनको लागि सुर्मा सरोबर क्षेत्र, धनसेरा, जलजला, पार्थि, चाँदेशिखर लगाएतका हिमालहरुमा जाने गरिन्छ ।
यार्सागुम्बा संकलन गर्न जिल्लाका विभिन्न ठाउँबाट जाने गर्दछन् भने छिमेकी जिल्ला दार्चुलाबाट पनि आउने गर्दछन् । विशेष गरेर जिल्लाको सुर्मा गाउँपालिका, तल्कोट गाउँपालिका, साइपाल गाउँपालिका, छविसपाथिभेरा गाउँपालिका, दुर्गाथली गाउँपालिका बुंगल नगरपालिका र जयपृथ्वी नगरपालिकाका अधिकांश स्थानियहरु हिमाली पाटनतिर जाने गर्दछन् ।
यार्सागुम्बा जिल्लाका उच्च हिमाली भुभागका स्थानियहरुको बलियो आयस्रोतका रुपमा रहेको छ । लगाएको अन्नबालीले तीन महिना पनि अधान्ने र रोजगारी पनि केहि नभएकाले स्थानियहरु ज्यानै जोखिममा राखेर हिमाली पाटनमा जाने गरेका छन् । स्कुले बालबालिकाहरु पनि पढाई छोडेर लेकतिर जाने गर्दछन् । यार्सा संकलनको क्रममा कयौंले वर्षेनी ज्यान पनि गुमाउदै आएका छन् । लेक लागेर, हिम पहिरोमा परेर, भिरबाट लडेर लगाएतका कारणले कयौं मानिस लेक तिरै ज्यान गुमाउछन् । गत वर्ष मात्रै बझाङका ६ जनाले हिम पहिरोमा परेर अकालमै ज्यान गुमाएका थिए ।
